KORTINI KWA RUSHWA

MHIFADHI wa wanyama pori katika hifadhi ya poli la Lwafi wilayani Nkasi mkoani Rukwa  Yohana  Mateo(39 ) amefikishwa katika mahakama ya wilaya Nkasi kwa kosa la kushawishi,kuomba na kupokea  rushwa kutoka kwa mfugaji ili asimchukulie hatua kwa kosa la kuchungia mifugo ndani ya hifadhi

Akisomewa mashitaka na mwendesha mashitaka wa taasisi ya kuzuia na kupambana na Rushwa (TAKUKURU) Expediter Ngwembe mbele ya hakimu mkazi mfawidhi wa mahakama ya wilaya Nkasi Ramadhani Rugemalila ni kuwa mtuhumiwa huyo akiwa kama mtumishi wa serikali  mnamo Marchi 2 mwaka huu alimshawishi mfugaji Kashija Nsenga mkazi wa kijiji cha Kirando ampatie Tshs,400,000 ili asi mchukulie hatua kwa kosa la kuchungia ng’ombe ndani ya hifadhi.

Alisema kuwa baada ya hapo TAKUKURU waliweka mtego na kumpatia mfugaji kiasi cha Tshs,100,000  na kuwa zoezi hilo lilifanyika ndani ya ofisi ya mhifadhi mkuu wa wanyapoli wilayani Nkasi ambapo walifanikiwa kumkamata mtuhumiwa na kumfikisha katika mahakama hiyo kujibu tuhuma zinazomkabili

Mwendesha mashitaka huyo wa TAKUKURU aliiambia mahakama hiyo kuwa mtuhumiwa huyo akiwa kama ni mtumishi wa serikali chini ya wizara ya maliasili na utalii kwa kitendo chake cha kushawishi na kupokea rushwa amekwenda kinyume na sheria kifungu No,15 (1)(2) ya mwaka 2007.

Mtuhumiwa kwa upande wake amekana shitaka na yupo nje kwa dhamana chini ya wadhamini wawili kila mmoja ikiwa na thamani ya Tshs,500,000  hadi hapo kesi hiyo itakapotajwa tena aprili 10 mwaka huu.

                                          Na, Lumemo blog