KORTINI KWA KUJARIBU KUUA

KIJANA mmoja aliyefahamika kwa jina la  Sura Mbaya  Lutemashimba (32) mkazi wa kijiji cha Maji moto wilayani Mpanda mkoani Katavi amefikishwa katika mahakama ya wilaya Nkasi  mkoani Rukwa kujibu tuhuma zinazomkabili za kujaribu kuua

Akisomewa mashitaka yake mbele ya hakimu mkazi mfawidhi wa mahakama ya wilaya Nkasi Ramadhani Rugemalila mwendesha mashitaka wa jeshi la polisi, mkaguzi msaidizi wa polisi Hamimu Gwelo ni kuwa mtuhumiwa akiwa na wenzie watatu walimvamia mwanamke mmoja  Ng’washa Mondo (50) mkazi wa kijiji cha Mtenga wilayani Nkasi na kumkatakata kwa mapanga kwa lengo la kutaka kuua

Alisema mtuhumiwa huyo akiwa na wenzie watatu baada ya kutekeleza hazma hiyo walikimbia wakiwa na imani kuwa mwanamke huyo amekwisha kufa ambapo alizinduka baada ya kufikishwa hospitalini

Mwendesha mashitaka huyo wa jeshi la polisi alidai kuwa mtuhumiwa huyo sambamba na wenzake walifanya uhalifu huo januari 7 mwaka huu nyumbani kwa mama huyo majira ya saa 2 usiku na kukamatwa Februari 20 mwaka huu

Alisema kuwa mtuhumiwa huyo amefanya kosa hilo chini ya kifungu cha 211 cha kanuni ya adhabu sura ya 16 iliyofanyiwa marekebisho mwaka 2002 na kuwa mtuhumiwa ana kesi ya kujibu

Mtuhumiwa hakutakiwa kujibu lolote baada ya mahakama hiyo kutokuwa na uwezo wa kuisikiliza kesi hiyo ambapo kesi itatajwa tena marchi 11 mwaka huu na kurudishwa rumande

Upande wa mashitaka uliitaka mahakama kutotoa dhamana kwa mtuhumiwa huyo kwa sababu upelelezi wa kesi hiyo bado haujakamilika na pia watuhumiwa wengine watatu bado hawajakamatwa

Wakati huo huo mahakama ya wilaya Nkasi imemhukumu kwenda jela miezi sita au kulipa faini ya Tshs,40,000 Martin Kipeta (32)  mkazi wa kijiji cha Isunta wilayani Nkasi  kwa kosa la kukutwa na bangi kilogramu 300 kinyume cha sheria

Mshitakiwa alikutwa na bangi hiyo August 8 mwaka jana na kukutwa na kosa hilo chini ya kifungu No,12 (d) sura ya 95 iliyofanyiwa marekebisho mwaka 2002 ya sheria ya kupambana na madawa ya kulevya

Mtuhumiwa aliachiwa huru baada ya kulipa faini ya Tshs,40,000 baada ya mtuhumiwa kukiri kufanya kosa hilo kinyume cha sheria

                                                 Na, Lumemo blog